A vedis no me gusta hablal...
a vedis,procuru callalmi
asina paici,que el mal es menus
que se achica y deborrifa...
comu el jumu
en el fogon mesmu...
Peru la jeria se encona,
escuedi y arrespela...
sin escapi pol dentru
ni salia pa juera.
Endecá que vengu intentandu
no jadelli casu,no pensal en en ella...
peru vieni con fuerza
rebosandu jiel
y se escondi logu...
en cualquiel jechura
palabra o mirá...
ya sea bonchi o regaera.
Ya no semus los mismus...
ya no es lo que era
el corazón pol dentru,
san forrau de tela...
Y a mí, pol no dalmi prisa
pol quealmi atrá...
creu...que el dololcillu
que sientu
debi sel...
que man pillau el jarapal.
V.
No hay comentarios:
Publicar un comentario